ദുബായ്: ദുബായ് ഇമിഗ്രേഷൻ എമിറാത്തി വനിതാ ദിനം വൈവിധ്യമാർന്ന പരിപാടികളോടെ ആഘോഷിച്ചു. അറബ് ലോകത്തിലെ ആദ്യ വനിതാ ബഹിരാകാശ സഞ്ചാരി നോറ അൽ മത്രൂഷി മുഖ്യാതിഥിയായി പങ്കെടുത്തു. തന്റെ ബഹിരാകാശ പര്യവേക്ഷണ അനുഭവങ്ങളും വെല്ലുവിളികളും നോറ അൽ മത്രൂഷി പരിപാടിയിൽ പങ്കുവെച്ചു.
ദുബായ് ഇമിഗ്രേഷൻ ഡിപ്പാർട്ട്മെന്റിന്റെ മേധാവി ലെഫ്റ്റനൻറ് ജനറൽ മുഹമ്മദ് അഹമ്മദ് അൽ മർറി ഉദ്ഘാടനം ചെയ്ത ചടങ്ങിൽ രാജ്യത്തിന്റെ ദേശീയ വികസനത്തിൽ എമിറാത്തി വനിതകളുടെ പ്രധാനപ്പെട്ട പങ്ക് അദ്ദേഹം എടുത്തുപറഞ്ഞു. ചടങ്ങിൽ നഖ്ർ സോഷ്യൽ ക്ലബിലെ മുതിർന്ന എമിറാത്തി വനിതകളും അവരുടെ അനുഭവങ്ങൾ പങ്കുവെച്ചു. ഡിപ്പാർട്ട്മെന്റിൽ വനിതാ ജീവനക്കാരുടെ സംഭാവനകളെയും പ്രത്യേകമായി ആദരിച്ചു.
എമിറാത്തി വനിതകളുടെ നേട്ടങ്ങളും നേതൃപാടവവും വിവിധ മേഖലകളിലെ മികവും പ്രദർശിപ്പിച്ച ഈ പരിപാടി വനിതാ ശാക്തീകരണത്തിനും ദേശീയ വികസനത്തിലും എമിറാത്തി വനിതകളുടെ സംഭാവനയെ ഉയർത്തിക്കാട്ടുന്നതുമായിരുന്നു.
